نوصيك يا قلبي

السلام عليكم

لاتبكي يا عيني على القلب لي بكاك
ولاتخمم يا قلبي على الحبيب لي خدعك و نساك
هذوك مايستاهلوكش و أنت ليهم واش داك
رحت للبعاد و خليت ليهما بجنبك و حذاك

تستاهل تنحرق و تستاهل تنكوى بالجمر
يخي هذا شعال قتلك أنت منحوس و معندكش الزهر
عييت مانوصي فيك نخبر فيك و نهدر
قتلك يجي نهار طيح في حفرة ولا تنعثر

تبعت هواك و ذروك شوف وين وصلت
قولي واش مصحاب دابزت عليهم و لفتهم و عشرت
قلت عندي صحابي عليت صوتك و هدرت
و ضربت صدرك و قريب عقلك عليهم و درت

كنت تقولي عندي حلم عنديdream عندي réve
وين راه كلشي ولا كوشمار و من روحك وليت تخاف
كنت تقولي يرفدوني فوق الراس و يرفدوني على لكتاف
و ذروك راك حزين وحداني شكون لي فيك شاف

مسكين أنت يا قلبي و الله مسكين
عدت تمد في يدك و تقول لله يا محسينين
نضحك عليك و نزيد نضحك عليك حتى يبانو السنين
راك في قفص حزين مظلم كي ذاك المقنين

قوتلك الصاحب ماشي هذاك لي ديما معاك يتمشى
ولا ذاك لي يقعد معك يفطر ولا يتعشى
كاين الصاحب صاحبلي تقول عليه حاشى
هذاك لي يرشى الساس و هو عمرو مايرشى

الصاحب باش تعرفه يخبرك عليه الزمان
يعطيك عليه درس و مايخليكش في la fin ندمان
أسمع لكلامي ولا في وسط الناس تنذل و تنهان
من إنسان ترجع حيوان و يروح منك القدر و الشان

هو صح الصاحب ربي عطاهلنا نعمة
لكن لازم تكون عندك عليه خبرة و حكمة
ماشي لي يضحك معاك و يزيد يذوبك بكلمة
تقول نموت عليه كالحوتة إذا خرجت من الما

كونك يا قلبي كالجبل عمرك ماتنهز

باش بين الناس تنحب و تزيد تنعز
و خليك من ذاك لي يمنشر و من ذاك لي يغمز
يخي أنت المليح و هوما كل واحد فيهم مخنز

خلي سرك محفوظ لاتبوح بيه و لا تشكي
و خلي الدنيا تنوح و أنت عمرك لا تبكي
و دير صاحب لي مايتبعش مالك و مايتبعش التيكي
و قولو أنا شريكك و ماتقولوش أنت شريكي
من تأليف : وادي الخير