لنتعرف على اولياء الله بمستغانم ....من ديوان بطبجي

ديوان عبد القادر بطبجي و تعداده لاوليا ء مستغانم و ضواحيها وهذه القصيدة تعتبر مصدر للتعرف عليهم لان المصادر قليلة وهي الموروت الغير المادي
عبد القادر يا بو علام ضاق الحال علي
داوي حالي يا بو علام لله روف علي

ضاق الحال علي فنيت خلخل عقلي و رشيت
يا العرج راك سهيت جفيتني غير بلا سية

بلا سية حفيت راك نسيتني و إلا جفيت
أنت مذكور تغيث من حصل في ذيك و ذي

ينده بك المغبون يا قويدر قرة العيون
في البادية و المدون طاعت لك كل ثنية

طاعت لك كل بلاد ملوك و وزرا و قياد
أنت رايس الاعقاد يا الفحل ولد السنية

يا سلطان الصلاح يا قويدر ممو الالماح
أنا جيتك نواح لا تخيب دعاء ليا

في هذا التوسل نقصد البغدادي جلول
مول السر المكمول لفحل سلطان الأولياء

أول ما نقصد الفحل جلول الواكد
من بحره نورد كيف ما شربوا أهل النية

بمقامته نبدأ نحشم رواحن الوكدة
هما ساس العمدة أهل الأسرار الخفية

وين مول الصفاح فيه قلب الشايق يرتاح
يبرا من كل الجراح و الهموم و كل بلية

وين مول الناضور المقام اللي هو مشهور
تما توجد قدور فيه كل الصباح و عشية

وين مول الدومة فيه حويطة معلومة
دايم فيه مقيمة الخديم و الروحانية

وين مول المعزة قاصده ما ينظر لزة
عمره ما يستهزا يدير للمغبون مزية

وين مول العودة رواحنه دايم مجتهدة
من راح ليهم ادا اللي طلب نال الكمية

وين مول التراس دايم روحاني عساس
ما دفعوا كي قياس ما يدوروا عنده عديا

المقام الكروشة تما ما تبقى لك وحشة
فيها القوة باشا اللي سعدهم عالي العليا

هذي غير مقامات بوعلام رفيع الدرجات
فيهم روحانيات يرتجاوا أصحاب السعية

وين عقيد القوم بوعلام ظريف الخرطوم
راه خديمك مظيوم نرغبك تنيف علي

وين رجال بلادي وين سعيد البوزيدي
و الأربعين سيادي المسمية ربعين شاشية

وين سيدي عبد الله المخمر مول الدولة
وين أصحابه جملة أهل المطمر الكلية


يا سيد أحمد بالحلوش و المزعزع سيدي حمادوش
وين سيدي خرشوش وين أولاد العجمية

وين سيدي السايح صاحب البرهان الناصح
يرفد من هو طايح قبته تزار خفية

وين سيدي بوعجاج المخمر رايس الانتاج
بحره دافق بأمواج من الأسرار الإلهية

وين يحيى الوكاد من فنى عمره في الجهاد
عجامي من الجواد من اسطنبول حقيقية
ناس العرصة نقصد في أولاد جماعة نسعد
القايد محمد ثمة نحكي له ما بيا

نقصد سيدي عثمان الفحل غياث اللهفان
مول السر و البرهان صاحب الحكمة الألفية

الرجال الصيادة أهل المغاير و العبادة
قاصدكم في شدة دخيل لكم حنوا فيا

وين أهل المنور و الجبل و الكاف الأصفر
وين أهل القناطر كلهم والي و ولية

وين رجال يناره سهاوا راهم ما يفتكروا
وين الشايع خبره بو قبرين حرير الأولياء

أهل الشلف و الظهرة كل منهم رجل و أمرة
وين أهل البصيرة و الخصلة الربانية

وين لخلوفي لكحل وين ربيع البطل الكامل
عفيف المتأصل من أولاد الهاشمية

وين رجال الواد كلهم سياح و عباد
سيد اعمر الوكاد المزعزع بن مغنية

وين مخبل الشعور المسلك منه ميسور
مول السر المشهور المخنت حمو خويا

وين سيدي الزواوي و أهل جبل الديس القاوي
للعبادة مروي فيه صلاح الجمعية
وين القطب المحبوب
المخمر سيدي المجدوب
ساكن بحر الموهوب مول المغارة المخفية

وين سيدي لحسن الشريف التقي المحسن
قندوزك تمحن العفو يا زين النية

وين مول النخلة الشريف ظريف الحلة
سلكنا من الحصلة و لا تشفي فينا عديا
وين سيدي واضح المخمر نور اللامح
خلاني نتقروح ما علم أش اللي بيا

وين سيدي بن مصابيح من حفظ تأويل التسبيح
من قصده ليس يجيح يبشر بحاجته مقضية

وين سيدي بن هجي وين وين اصحابه الربعين
أهل التقوى و الدين أهل الفروض و السنية

وين سيدي معزوز المسمي بالنصر و الفوز
سلاك اللي محيوز من الحبل و العناقية

وين سيدي معمر و الفحل سيدي بن صابر
شباب اللي باير يا عمارة كل ثنية

الدايج المذكور و الفحل سيدي بن دردور
هو شيخ مذكور من حفظ تأويل الاية

وين لالة شريفة و لالة خدومة الغدفة
الياقوتة الموصوفة و فين المزغرانية

بن تازي سيد أحمد و المقدم خوه الواكد
سلسلة من جد لجد طريفتهم رحمانية

فين سيدي بن زعيم من خفى سره بالتسليم
هو رايس المقاديم في الطريق الجيلانية

وين سيدي عبد الاله و اللي مدفونين معه
خدم ربي و عطاه سعد من قصده بالنية

وين عز الزير السنوسي قطب الابرار
وجه شارق بانوار المسمي حمر اللحية

يا سيدي بن مهون قصدت لك حالي متشطن
عيب انايا ننغبن و انتيا كاين في الدنيا

يا سيدي علال القصوري انت طبيب و سرك واري
لك المرضى تجري و منك تنال العافية

وين امام الابدال المخمر سيدي علال
بن محمد يا عنال في حومته عاشر انايا

هو واجب ينلام كان خلاني انا ننظام
و اللي رقبة درغام جاري ما يرى أدايا

يا سيدي الحمادي بالمخمر نور اثمادي
يا زنجار العادي يا الفحل يحيى بن يحيى

وين سيدي المخفي صاحب البرهان الوافي
لك اسندت اكتافي قصدت ليك تنيف علي

وين سيدي جبار صاحب البرهان و الاسرار
انت جاري في الدار ما خفاتك حتى حية

وين سيدي سالم الشريف القطب الاعظم
مول السر القايم روف لي لله يا بويا

يا بن عيسى الهادي نرغبك يا نور اثمادي
اقبل تمجادي لا تشفي فيا عديا

وين سيدي بختي يا الفحل اقبل طلباتي
راك عالم شداتي حكيت لك جميع القصية

وين سيدي يعقوب الشريف الحسن المحبوب
من جا عنده معطوب ما يرى باذن الله حية

وين سيدي بن حواء المزعزع مول التقوى
مول السر و الخلوة عنايتي سيد الصوفية

وين سيدي بن خلوف الشريف الحسن المعروف
اقصده يا الملهوف لا تفرط ذا الوصية

وين اهل مزرغان و الفحل سلطان احميان
جاب خديمه تعيان سلكه من بر الخزية

بالقاسم بن صابر صاحب البرهان الحاضر
جايب المتيسر المسمي بوعسرية

الحراق الاسد ماله في وعدي راقد
ما جاشي محمد ما علم اش اللي بيا

اه يا سيدي الحراق يا التختنر يا بو مزراق
صدري بالهم اضياق فكني من هاذ البلية

فين سيدي منصور صاحب البرهان المذكور
قاصدهم ليس يبور يبشر بحاجته مقضية

فين سيدي الشارف نرغبك يا دلالي عف
انا راني خايف زورني ولو في الروية

وين سيدي العجال بن ذهيبة و اصحاب الحال
فكونا من الاهوال سلكونا من الهاوية

وين اهل واد الخير كلهم منهم شايب و صغير
وين سيد البشير و الاجداد مع الذرية

يا سادات الله ارغبوا اللي مرفوع الجاه
يعطف عني و نراه بوعلام حرير الاوليا

طالب عيني تشفاه راه صاعب عني ملقاه
خلاني الا بهواه نرتجاه الصباح و عشية
كان لقيته نسعد ما بقى حالي ما يكسد
من لا كيفه سيد في جميع البرية

يا ساداتي لله خديمكم ديروا له الجاه
لا تهدوني بواه دبروا لله عليا

وقفوا للشاعر لا تخليوه متحير
بطبجي عبد القادر قاصد سيادي جمعية

نختم قولي بالتمام بالف صلاة و الف سلام
دايم طول الدوام على احمد خاتم الانبياء
عبد القادر يا بو علام ضاق الحال عليا

السلام عليكم
جعلنا الله من أوليائه الذين لا خوف عليهم و لا هم يحزنون فكل شخص تقي يخاف الله قد لا نعير له بالا يمكن أن يكون من أولياء الله يبات ساجدا و قائما يصلي و له قلب موحد سليم و أرجو فقط أن ترفقي مقالاتك حول الأولياء بدعوة القراء إلى التوحيد و احترامهم دون الاعتقاد بأنهم ينفعون و يضرون

تحية الى المستغانمية الحرة ياسمين..
مرثية الشاعر تدكرنا بالزمن المستغانمى الجميل ,رغم كل هذا مازالت مدينتنا فى جوهرها وافية لهم ...اللهم ارحم حراس مدينتا الصالحين,,,,

شكراا على مروركم
اخي العجيسي انت من قال يوما ان القبة شخصية الجزائر وان القبة كيان ضارب في جدور التاريخ الامازيغي قبل الاسلام وما قبة سيدي عبدالله الا استمرار لثقافة الامازيغية القديمة.......نحن نفهم لغة بعضنا جيدا اليس كذلك

من يكون عبد القادر بطبجي هذا أهو من القدماء؟؟؟؟؟؟؟؟

لشيخ عبد القادر بن طبجي دفين مستغانم مع مقام سيدي عبد القادر وله ديوان مطبوع في مدح الأولياء من الأقطاب أو من مؤسسي الطرق الصوفية الكبرى و قصيدة عبد القادر يا بوعلام جمع فيها اولياء مستغانم و هي تعتبر مصدر موثوق لانه ذكر كل الاولياء و عن دراسة وهو من مستغانم
يقول وقفوا للشاعر لا
تخليوه متحير
بطبجي عبد القادر قاصد سيادي جمعية